16 նոյեմբերի, 2026 թ. 5 րոպե

Կացության գործերի կառավարման նոր էլեկտրոնային համակարգը Հայաստանում. ովքեր կարող են դիմել, ինչպես և ծառայությունների արժեքները

Armenians residency
Մելինե Նադարյան  Իրավաբան

Նախկին workpermit.am համակարգը փոխարինվել է mcs-permits.am միասնական էլեկտրոնային հարթակով, որի միջոցով իրականացվում են Հայաստանում կացության կարգավիճակի տրամադրման, երկարաձգման և դադարեցման հետ կապված ծառայությունները։ Հարթակի մշակմանն աջակցել է Միգրացիայի միջազգային կազմակերպությունը (ՄՄԿ), իսկ այն վարում է Հայաստանի Հանրապետության ներքին գործերի նախարարության Միգրացիայի և քաղաքացիության ծառայությունը (ՄՔԾ)։

Հարթակը չի սահմանափակվում միայն աշխատանքի թույլտվություններով։ Այն ընդգրկում է կացության կարգավիճակի համար դիմելու հիմքերը, ընդ որում դիմողի գրանցման և համակարգ մուտք գործելու եղանակը կախված է նրանից, թե ով է նա։ Սույն հոդվածում ներկայացվում են յուրաքանչյուր հիմքը, պահանջվող փաստաթղթերը, պետական տուրքերը, ինչպես նաև այն նոր իրավական պահանջները, որոնք պետք է հաշվի առնեն գործատուներն ու դիմողները։

Կացության կարգավիճակ ստանալու հիմքերը

1. Հայկական ծագում

Օտարերկրացիները կարող են կացության կարգավիճակի համար դիմել հայկական ծագման հիմքով, եթե ներկայացնեն իրենց հայկական ծագումը հաստատող ապացույցներ։

2. Աշխատանք

Այս հիմքը հասանելի է այն օտարերկրացիներին, ովքեր ունեն կամ պատրաստվում են կնքել աշխատանքային պայմանագիր, կարող են ունենալ նաև կամավորական աշխատանքի պայմանագիր։ Այն վերաբերում է նաև այն անձանց, ովքեր Հայաստանի օրենսդրության համաձայն ազատված են աշխատանքի թույլտվություն ստանալու պարտականությունից։

Գործատուն դիմումը ներկայացնում է ընկերության հաշվի միջոցով՝ սեղմելով «Ավելացնել շահառու» կոճակը։ Ընթացակարգը և պահանջվող փաստաթղթերը մնում են նույնը, ինչ նախկին workpermit.am համակարգում։Փոփոխությունը կապված է պետական տուրքի հետ՝ դիմումը ստեղծելուց հետո պետական տուրքը պետք է վճարվի, ընդ որում վճարումը կարող է կատարել ինչպես գործատուն, այնպես էլ օտարերկրացին (շահառուն)՝ իրենց համապատասխան անձնական հաշիվների միջոցով։

Աշխատանքային պայմանագրի հիման վրա ներկայացվող դիմում

  1. Գործատուն մուտք է գործում կազմակերպության հաշիվ։
  2. «Մարդկային ռեսուրսներ» բաժնի «Աշխատակիցներ» ենթաբաժնում գործատուն ավելացնում է նոր աշխատակից։
  3. Գործատուն ներբեռնում է աշխատակցի անձնագիրը,  լուսանկարը և մուտքագրում նրա կոնտակտային տվյալները։
  4. Գործատուն լրացնում է աշխատանքային պայմանների հարցաշարը։
  5. Ստեղծվում է դիմումը։
  6. Պետական տուրքը վճարում է գործատուն կամ աշխատակիցը՝ իր անձնական հաշվի միջոցով։
  7. Դիմումը քննարկման է ներկայացվում ՄՔԾ։

Այնուհետև յուրաքանչյուր աշխատակից ծանուցում է ստանում համակարգում նշված էլեկտրոնային հասցեին։ Նամակում նշված հղումով անցնելով և նույնականացումն անցնելով՝ աշխատակիցը կարող է ստեղծել գաղտնաբառ և մուտք գործել իր անձնական հաշիվ՝ դիմումի կարգավիճակը ստուգելու համար։

3. Կրթություն

Օտարերկրյա ուսանողի համար ժամանակավոր կացության կարգավիճակի դիմումը պետք է ներկայացնի ուսումնական հաստատության ղեկավարը կամ լիազորված ներկայացուցիչը։ Ուսանողը համակարգում ավելացվում է հետևյալ տվյալների ներկայացմամբ՝

  • հանրային ծառայությունների համարանիշ (ՀԾՀ). ՀԾՀ չունեցող ուսանողը գրանցումից առաջ պետք է ստանա այն, քանի որ առանց դրա գրանցումն անհնար է;
  •  էլեկտրոնային փոստի հասցե և հեռախոսահամար;
  • 3×4 սմ լուսանկար։

Խիստ նույնականացման գործընթացն ավարտելու համար պահանջվում է էլեկտրոնային ստորագրություն։

4. Ձեռնարկատիրական գործունեություն

Անհատ ձեռնարկատիրական գործունեության հիմքով դիմելու դեպքում գրանցվում են հետևյալ տվյալները՝

  • անձնագրի պատճեն;
  • բանկային հաշվի քաղվածք;
  • հանրային ծառայությունների համարանիշ (ՀԾՀ);
  •  էլեկտրոնային փոստի հասցե և հեռախոսահամար;
  • 3×4 սմ լուսանկար։

Հարթակի պաշտոնական պահանջների համաձայն՝ դիմողը պետք է բավարարի հետևյալ չափանիշներից առնվազն մեկը՝

  • նախորդ հաշվետու ժամանակաշրջանում առնվազն 1,000,000 ՀՀ դրամ շրջանառություն; կամ
  • բանկային հաշվում առնվազն 1,000,000 ՀՀ դրամ մնացորդ։

ԵԱՏՄ քաղաքացիների համար պետական տուրքը 30,000 ՀՀ դրամ է։

Ի տարբերություն նախկին համակարգի՝ աշխատանքային պայմանագիրն այլևս պետք չէ ներբեռնել։ Հարկային համակարգում որպես աշխատող գրանցված անձը ճանաչվում է ավտոմատ կերպով։

5. Ընտանեկան հանգամանքներ

Հայաստանի Հանրապետության քաղաքացին կամ Հայաստանում կացության կարգավիճակ ունեցող օտարերկրացին կարող է դիմում ներկայացնել՝ իր օտարերկրացի ծնողի, ամուսնու կամ երեխայի համար ժամանակավոր կացության կարգավիճակ ստանալու նպատակով՝ խիստ նույնականացում անցնելուց հետո։

Պետք է ներկայացվեն՝

  • շահառուի վավեր անձնագիրը;
  •  էլեկտրոնային փոստի հասցե և հեռախոսահամար;
  • 3×4 սմ լուսանկար;
  • ընտանեկան կապը հաստատող փաստաթղթեր՝ ծննդյան վկայական և/կամ ամուսնության վկայական՝ ըստ անհրաժեշտության։

Խիստ նույնականացման գործընթացն ավարտելու համար պահանջվում է էլեկտրոնային ստորագրություն։

Ինչպես են օգտատերերը գրանցվում և մուտք գործում համակարգ

Կախված օգտատիրոջ կարգավիճակից՝ համակարգն առաջարկում է մուտքի երեք տարբերակ․

Գրանցում՝ դիմում-հարցաթերթիկը լրացնելու միջոցով

Առցանց հարցաշարը լրացնելով՝ գրանցվել և անհատական դիմում ներկայացնել կարող են՝

  • ԵԱՏՄ քաղաքացիները՝ ֆիզիկական անձինք, որոնք ունեն աշխատանքային պայմանագիր;
  • Հայաստանում որպես անհատ ձեռնարկատեր գրանցված օտարերկրացիները;
  • հայկական ծագում ունեցող օտարերկրացիները։

Գրանցում՝ խիստ նույնականացման միջոցով

Խիստ նույնականացման գործընթացի միջոցով գրանցվել կարող են՝

  • Հայաստանի Հանրապետության քաղաքացիները;
  • իրավաբանական անձանց տնօրենները;
  • Հայաստանում վավեր կացության կարգավիճակ ունեցող օտարերկրացիները։

Խիստ նույնականացման գործընթացն ավարտելու համար պահանջվում է էլեկտրոնային ստորագրություն։

Մուտք՝ էլեկտրոնային փոստի միջոցով

Համակարգ էլեկտրոնային փոստի միջոցով մուտք գործել կարող են՝

  • այն օտարերկրացիները, ում համար գործատուն կացության դիմում է ներկայացրել;
  • այն օտարերկրյա ուսանողները, ում համար բարձրագույն ուսումնական հաստատությունը դիմում է ներկայացրել;
  • Հայաստանի քաղաքացիների կամ Հայաստանում կացության կարգավիճակ ունեցող օտարերկրացիների օտարերկրացի ծնողները, ամուսինները կամ երեխաները, ում անունից դիմում է ներկայացվել։

Պետական տուրքեր

Հիմնական ծառայությունների համար պետական տուրքերը հետևյալն են՝

ԾառայությունՊետական տուրք
Ժամանակավոր կացության կարգավիճակ150,000 ՀՀ դրամ (~$410)
Ժամանակավոր կացության կարգավիճակ ԵԱՏՄ քաղաքացիների համար30,000 ՀՀ դրամ (~$80)
Մշտական կացության կարգավիճակ250,000 ՀՀ դրամ (~$690)
Կացության օրինականությունը հաստատող տեղեկանք30,000 ՀՀ դրամ (~$80)
Կարևոր նշում փաստաթղթերի վերաբերյալ․ Բոլոր օտարալեզու փաստաթղթերը պետք է պատշաճ կարգով վավերացվեն գործող իրավական պահանջներին համապատասխան և լինեն հայերեն թարգմանությամբ՝ նոտարական կարգով վավերացված կամ հյուպատոսական ուղիներով հաստատված։ Սա վերաբերում է նաև անձնագրի թարգմանությանը։

Կարևոր իրավական պահանջներ

Ստորև նշված պահանջները հատկապես կարևոր են գործատուների համար։

  1. Դիմումների լրացում։ Եթե ՄՔԾ-ն պահանջում է լրացուցիչ փաստաթղթեր կամ տեղեկություններ, ծանուցման մեջ նշված գործողությունները պետք է կատարվեն 5 օրվա ընթացքում։ Հակառակ դեպքում վարչական վարույթն ավտոմատ կերպով կասեցվում է։
  2. Անձամբ ներկայանալը։ Կացության քարտ ստանալու համար դիմողը պետք է անձամբ ներկայանա՝ մատնահետքեր և էլեկտրոնային ստորագրության նմուշ տրամադրելու նպատակով։
  3. Հայաստանում օրինական գտնվելու ժամկետը։ Եթե դիմումի քննարկման ընթացքում դիմողի՝ Հայաստանում օրինական գտնվելու ժամկետը լրանում է, նրա գտնվելը համարվում է օրինական մինչև վարչական վարույթի ավարտը։
  4. Հայաստանից երկարատև բացակայություն։ Հայաստանից 183 օր կամ ավելի բացակայող անձը պետք է 10 օրվա ընթացքում հարթակի միջոցով այդ մասին ծանուցի համապատասխան մարմիններին՝ օրենքով նախատեսված բացառությունների պահպանմամբ։
  5. Աշխատանքային վիզա։ Նոր կանոնակարգերով նախատեսվում է նաև աշխատանքային վիզայի պահանջ։ Օտարերկրյա աշխատակիցներ ներգրավելիս գործատուները պետք է առանձին ստուգեն յուրաքանչյուր անձի նկատմամբ կիրառելի վիզայի և աշխատանքի թույլտվության պահանջները։
Կարևոր նշում Համակարգը գործարկվել է վերջերս, և որոշ մանրամասներ դեռ չեն հստակեցվել կամ հանրությանը հասանելի չեն դարձել։ Այդ իսկ պատճառով սույն ուղեցույցը դեռ ամբողջական չէ և չի անդրադառնում բոլոր չլուծված հարցերին։ Լրացուցիչ պարզաբանումներ ստանալուն զուգընթաց մենք այն կթարմացնենք։

Կապ մեզ հետ